Tranblemanntè 4.1 sou echèl Richter frape zòn Pòtoprens, panik lakay plizyè abitan

Yon tranblemanntè ki gen yon magnitid 4.1 sou echèl Richter frape rejyon Pòtoprens lendi swa 4 out 2025, a 11è 02 nan aswè. Daprè premye enfòmasyon yo, sant tranblemanntè a te sitiye apeprè 13 kilomèt nan nòdwès Petyonvil, nan depatman Lwès peyi a. Goudougoudou a te santi tou nan Repiblik Dominikèn, vwazen Ayiti a. Nan kapital la, plizyè abitan rapòte yo te santi tè a tranble, sa ki lakòz sèn panik nan kèk katye. Pou kounye a, otorite yo poko rapòte okenn dega grav ni viktim.